ភ្នំពេញ៖ នាយករដ្ឋមន្ត្រីកម្ពុជាសម្តេចតេជោ ហ៊ុន សែន បានស្នើទៅដល់អ្នកនាង មាស សុខសោភា ឱ្យដកចេញនូវបទចម្រៀងមួយបទដែលមានចំណងជើងថា មរណៈភាពព្រះស្វាមី ជ័យវរ្ម័នទី៧ ដែលបានធ្វើឲ្យប៉ះពាល់ជាខ្លាំងដល់ប្រវត្តិសាស្ត្រកម្ពុជា។

ក្នុងសារសំឡេងពិសេសនៅយប់ថ្ងៃទី៤ ខែមិថុនាឆ្នាំ២០២៣នេះ សម្ដេចតេជោ ហ៊ុន សែន បានលើកឡើងថាបទចម្រៀង មរណៈភាពព្រះស្វាមី ជ័យវរ្ម័នទី៧ បានធ្វើឲ្យប៉ះពាល់ជាខ្លាំងទៅដល់ប្រវត្តិសាស្ត្រកម្ពុជាធ្វើឲ្យមានការភាន់ច្រឡំទាំងដែលមិនទាន់មានអំណះអំណាងណាមួយច្បាស់លាស់អំពីមរណភាពរបស់ព្រះបាទជ័យវរ្ម័នទី៧ នៅឡើយនោះ។

បទចម្រៀង មរណៈភាពព្រះស្វាមី ជ័យវរ្ម័នទី៧ ត្រូវបានតែងនិពន្ធដោយលោក ពេជ្រ សង្វាវង្ស ហៅ តាសក់ស ភ្នំត្បែង ដែលមានអត្ថន័យពីជម្លោះសាសនានិងការយកព្រះបាទជ័យវរ្ម័នទី៧ទៅសម្លាប់។

ទាក់ទិននឹងបញ្ហានេះក្រសួងវប្បធម៌ និងវិចិត្រសិល្បៈ នៅថ្ងៃទី៤ ខែមិថុនានេះក៏បានទទូចសុំឲ្យអ្នកនាង មាស សុខសោភា និងអ្នកពាក់ព័ន្ធផ្សេងទៀតលុបចោលបទចម្រៀង «មរណភាពព្រះស្វាមី ជ័យវរ្មន័ទី៧» ពីបណ្តាញសង្គមហ្វេសប៊ុក និងបណ្តាញសង្គមផ្សេងទៀតជាបន្ទាន់។

ក្រសួងបញ្ជាក់ថា ការផលិតបទចម្រៀងខាងលើ គឺពុំមានភស្តុតាងពិតប្រាកដ ដែលជាហេតុបង្កឲ្យមានការភ័នច្រឡំចំពោះប្រវត្តិសាស្រ្តកម្ពុជា។ ក្រសួងក៏សូមអំពាវនាវចំពោះសិល្បករ ក៏ដូចជាផលិតករទាំងអស់ដែលចង់បង្កើតនិងផលិតស្នាដៃពាក់ព័ន្ធនឹងវប្បធម៌ ឬប្រវត្តិសាស្រ្តជាតិ សូមធ្វើការសិក្សាស្រាវជ្រាវឲ្យបានគ្រប់ជ្រុងជ្រោយ ឬក៏អាចស្នើសុំសហការជាមួយក្រសួងវប្បធម៌ ឬអ្នកស្រាវជ្រាវនានា ដើម្បីរក្សានូវតម្លៃប្រវត្តិសាស្រ្ត និងវប្បធម៌ដ៏ផូរផង់របស់ជាតិ៕